ភ្នំពេញ៖ ក្នុងឱកាសបុណ្យអុំទូករយៈពេល ៣ថ្ងៃ ក្រុមគ្រូពេទ្យនៃក្រសួងសុខាភិបាលបានពិនិត្យព្យាបាលដល់ពលរដ្ឋមានបញ្ហាសុខភាពប្រមាណ ៩ ៦១៥នាក់ដោយឥតគិតថ្លៃ។ បើតាមក្រសួងសុខាភិបាល ពលរដ្ឋភាគច្រើនមានបញ្ហាសុខភាពដូចជា ផ្តាសាយ ហៀរសំបោរ គ្រុនក្តៅ ឈឺក្បាល ចុកពោះ រាក លើសឈាម ឈឺភ្នែក អស់កម្លាំង ខ្យល់ចាប់ គ្រោះថ្នាក់ចរាចរណ៍ និងជំងឺផ្សេងៗទៀត។

រដ្ឋមន្រ្តីក្រសួងសុខាភិបាល លោក ឈាង រ៉ា បានថ្លែងអំណរគុណដល់មន្រ្តីសុខាភិបាលពាក់ព័ន្ធ ជាពិសេសក្រុមគ្រូពេទ្យប្រចាំការ និងក្រុមគិលានសង្រ្គោះដែលបានលះបង់ទាំងកម្លាំងកាយចិត្ត ចូលរួមបំពេញភារកិច្ច ដើម្បីផ្តល់សេវាជូនប្រជាពលរដ្ឋនាឱកាសបុណ្យអុំទូកនេះ។

សូមបញ្ជាក់ថា ក្រសួងសុខាភិបាលបានត្រៀមក្រុមគ្រូពេទ្យ និងរថយន្តគិលានុសង្រ្គោះ សរុបចំនួន ៧០គ្រឿង ដែលមានរថយន្តប្រចាំការតាមគោលដៅចំនួន ៥០គ្រឿង រថយន្តគ្លីនិកចល័ត ចំនួន ៤គ្រឿង និងជម្រកតង់ពិនិត្យសុខភាពដើម្បីផ្តល់សេវាសុខាភិបាលចំនួន ១៥កន្លែង ដែលផ្តល់សេវា ២៤ម៉ោងលើ២៤ម៉ោង។ ដោយឡែកនៅទីស្តីការក្រសួងសុខាភិបាល ក៏បានត្រៀមរថយន្តគិលានសង្រ្គោះ ចំនួន ២០គ្រឿង ដើម្បីប្រចាំការត្រៀមអន្តរាគមន៍សង្រ្គោះបន្ទាន់ក្នុងករណីចាំបាច់៕